ساخر سبيل
الفاتح يوسف جبرا
هترشات
– مما الناس قعدت تهبش فى السلم التعليمى وتغير فيهو التعليم ماضاق عافية وما قامت ليهو قائمة تانى .. يا
جماعة الخير التعليم ده زى فريق الكورة لمن يكون ماشى كويس ما بعملو فيهو تغيير.. لكن نقول لمنو
– قرأت تقريراً علمياً عن أضرار تناول الدكوة وتسببها فى مرض السرطان لذلك ومن هذا المنبر أنادى بفصل الدكوة عن السلطة .
– من علامات العبقرية التى أصبح يتمتع بها الشعب السودانى أن الطالب الجامعى بيدخل المحاضرة ما شايل ليهو لا ورقه لا قلم .. فى عبقرية أكتر من كده !
– عندما ذهبت إلى الطبيب اشكو له إرتفاع ضغط الدم كتب لى فى الروشته .. إبتعد عن سماع تصريحات المسئولين (المجغمسة) وأغانى إذاعات الإف أم وتعال قابلنى بعد عشرة يوم (عشان المراجعة المجانية بتنتهى بعد أسبوع)
– نحن شعب لا يعرف الرشوة .. لم تسجل مضابط الشرطة منذ الإستقلال حالة واحدة لا لموظف أو لمسئول تمت رشوته .. نحن شعب مصنع بمواصفات عالية الجودة !
– لو كنت مسئولاً (كبيراً) لأصدرت أمراً بعدم ظهور المسئولين فى حفلات إفتتاح أى مشروعات … معقول وزير يسيب شغلو ومهامو ويمشى يفتتح ليهو (شفخانة) فى (أم جلافيط) مع أنو (أم جلافيط) الكهرباء ذاااتا لسه ما وصلتا ؟
– أيه المشكلة لمن ديوان الزكاة يتبرع بخمسين ألف دولار لقناة الضحى مش يمكن يكون فى مصرف إسمو (وفى القنوات) !
– التحدث بالموبايل مخالفة .. ما قلنا حاجة .. لكن الإنهماك فى مشاهدة ما تبثه (الشاشات التلفزيونية العملاقة) الختوها لينا قدام كل صينية وتقاطع دى أكبر مخالفة (يكون ناس المرور بياخدو برضو نسبة) !!
– لو قمت بتضريبه بسيطه لمنصرفات الزول (كان قعد فى سريرو وما قام) لمده شهر لوجدتها حوالى 100 جنيه بالجديد .. نفايات … خط تلفون .. إيجار عداد كهرباء.. إستهلاك مياه .. عوائد .. بالله ده إسمو كلام ؟
– من قام بإتخاذ قرار (السبت إجازه) إضافة ليوم الجمعة أكيد غلطان .. يومين إجازه ؟ وخمسة يوم شغل؟ مفروض يكون العكس خمسة يوم إجازة ويومين شغل !
– تمتلئ الوسائط الإعلامية هذه الأيام بإعلانات عن المستوصفات الإستثمارية من شاكلة .. لقد تم بحمد الله وتوفيقه افتتاح (مستوصف تمساح الدميرة التخصصى) لجميع الأمراض وبأطباء عالميين ، المستوصف تتوفر به جميع أقسام الرعاية الطبية…. قسم خاص للغسيل…غسيل كلى…غسيل مخ ..غسيل عدة.. غسيل سجّاد وموكيت …غسيل بخار مستعجل وغسيل جيوب (طبعن) !
– بعد وضع الإشارات الضوئية مكانها تأكد لى بأن لدى الحكومة إصرار عجيب فى (حذف) الصينية من حياتنا.
– يقولون أن عهد الأنبياء قد ولى ولكن لدينا خمسة ملايين (مسئول) معصومون عن الخطأ !
– بعد أن إستمعت إلي بعض أغانيه مؤخراً بالصدفة عرفت لماذا سمى هذا (الفتاك) بالإنبراتور
– أجمل ما فى جامعاتنا أن الطالب يتخرج منها وهو يعرف القراءة والكتابة .
– لا يوجد لدينا عاطل واحد عن العمل فنصفهم قد هاجر بينما النصف الثانى قد قضى نحبه منتظراً .
– أعجب للأثرياء الذين لهم أكثر من نشاط (أدب ? رياضة ? صحف ? شعر ? تلحين) شخصياً لو كنت أمتلك مليوناً واحداً من الدولارات لما كتبت سطراً واحداً .. أكتب وللا أقعد أعد فى المال ده ؟
– هل تعلم عزيزى القارئ ان الفرق الوحيد بين عربة الإسعاف (عندنا) والعربة العادية أن الأولى يفسح لها الطريق .. لا كادر طبى لا أدوية منقذة للحياة لا أجهزة ولا يحزنون – سفاراتنا فى الخارج تحتاج إلى مراجعة (زى أى حاجة تانية عندنا) .. مات أحد أبناء الوطن فى إحدى البلدان الأوروبية وعند الإتصال بالسفاره قالت أنها تستطيع فقط أن توفر (شهادة وفاة) مجانية ! ? أيه المشقة والتعب ده كلو؟
كسرة :
نما إلى علمى أن (الأخطبوط بول) الذى إستخدم للتكهن بنتائج كأس العالم الأخير قد مات .. يبدو أن أحدهم سأله التكهن عن مستقبل السودان !
حذف الصينية براهو ..انا خايفة سندوشتات الفول والطعمية ما نلم فيها حليل زمن الصوانى ….غايتو شايفة بشبش مشى القضارف عشان يملا عين الناس بالدرة ويرحمنهم ويقول ليهم ما تخافو ما ح تموتو من الجوع السنين الجاية دى ح تعدوها موص ساااكت
الغريب أن كل مسؤولي الحكومة والبنوك وشركة دال والدكاترة نايريين وليهم لمعة من وين ما عارف لان كل الشعب مفلس حااااااجة غررررريبة
(الأخطبوط بول) سئل عن مستقبل السودان ولا 9 مليار !؟:crazy:
حلوة ( المجغمسة ) دي دا قاموس بشبش المهترش . ثم إنك يا جبرة مفتح جنس فتيحة
صحي ليه ما سمعنا بي زول مسكوه مرتشي ؟ حاجة عجيبة . وحليل الصواني ياجبرة الله لا يحضرنا زمنا أكعب من ها الزمن ومع جماعة العواسة والطربقة فوق العيش الله يكذب الشينة.
والله من أحلى الحاجات وفاة الاخطبوط بول\خايفو يكون مات منتحر ولا اغتيال
الصينية الحذفوها دي ما يمكن إعادتها من سلة المحذوفات
الله اجازى محنك ابو ناجى
الليله السلطك على شنو بجغبس فى دكوتى كان كدى النشوف لى تميس من بدرى:mad: 😡 😡
بول مات عشان سألوهو هل الحضري حينستر مع ( الوصيف اب ضلا وريف ) أم لا ؟!!:lool: :lool: :lool: :lool: :lool: :lool: :lool: :lool: :lool: :lool: :lool: :lool: :lool: :lool:
بول دا في واحد سأله التكهن عن مستقبل السودان …بعد اسؤال طوالي جاته حالة هيستيرية ومات….لئيم السأله عن مستقبل السودان …ومسكين بول ما كان عارف عن سودان حاجه
والله ياجبرة الناس ديل حيرونا هم لو دايرننا نخلى ليهم السودان دا كلو كلو مايكونو واضحين الوضوح دا احسن منو فى ربنا استر على الباقين ويعوض المبادين الجنة
يا أستاذ .. ألم تستمع لشقيق الإمبراطور ( الملك) الفنانين تافسوا ستات الشاى فى الكثرة وسوف نرى عما قريب (القيصر) و(السلطان) وربما (فرعون) و (هامان) أغانى هابطة وشعر ركيك رحم الله سيد عبد العزيز وبشير عتيق و(الحلنقى) عندما نضبت قريحته الشعرية وفاجأنا ب (مامشكلة)
يا أبو الشوش هو فى وضوح أكتر من ده مانخنا خلينا ليهم السودان من زمان فراق الطريفى لى جمله
تحية للاستاز جبرة والله هترشاتك دى طالعة من جوانا وبتريحنا والله يقوينا ويقويكم على مدرسة النفاق والظلم والحرمنة
حقيقة الجماهة المهوسيين ديل قائلين نفسهم جاين من الله عديل نهاي ما فيهم زول بغلط عداهم العيب.
ال 9 مليار تروح مامشكلة الصينية تروح مامشكلة والاخطبوط يروح ما مشكلة ……. السودان يروح دي المشكلة
انهيار التعليم وانهيار الأخلاق وانهيار الصحة وانهيار العمل المدني وانهيار السفارات وانهيار الاسعار وانهيار الجنيه ….الخ
كســــــــــــرة:
والبشير ونائبه يقولوا السودان متقدم , والله لو بقروا مثل هذه المقالات لتقدم السودان فعلا:D 😀 😀 😀